← All books
AMPKIKUYUKJVNIVNKJVNLTNRSV
1No rĩrĩ, bũrũri ũyũ ũtũire na mĩtangĩko nĩũgatiga gũikara ta wĩ marundurundu. Mahinda ma tene-rĩ, Ngai nĩaatũmire bũrũri wa Zebuluni, o na wa Nafitali, mamenererio; no rĩrĩ, mahinda maya ma kũrigĩrĩria nĩanenehetie ngumo yamo mũno, ĩgatambũka kũrĩa guothe kũng’ethanĩire na iria, o na mũrĩmo ũrĩa ũngĩ wa Jorodani, Galili-kwa-Ndũrĩrĩ.
2Andũ arĩa maatũire mageraga nduma-inĩ-rĩ, nĩmonete ũtheri mũnene, o nao arĩa maatũũraga bũrũri wĩ nduma ya gĩkuũ nĩmaarĩirũo nĩ ũtheri.
3Wee, Ngai, nĩũtũmĩte rũrĩrĩ rũu rũingĩhe, na ũkongerera gĩkeno kĩaruo; andũ aruo makenagĩra mbere yaku, o ta ũrĩa gũkenagwo hĩndĩ ya magetha, o na ta ũrĩa andũ makenaga makĩgayana indo iria matahĩte.
4Nĩ gũkorũo wee nĩuunangĩte mũtĩ wa ngingo ũrĩa rũrĩrĩ rũu rũatitikithĩtio, o na ndotono ĩrĩa andũ aruo maahũragwo ciande nayo, o na rũthanju rũa mũmahinyĩrĩria, o ta ũrĩa wekire mũthenya wa Midiani.
5Nĩ gũkorũo indo ciothe cia mbaara cia andũ arĩa mathiaga harĩa ĩritũhĩire maciĩhumbĩte, o na nguo iria ciagagĩtio thakame-inĩ-rĩ, igatuĩka cia gũcinwo o ta irĩ ngũ.
6Nĩ gũkorũo nĩtũciarĩirũo kaana, tũkaheo kahĩĩ, naguo wathani ũkagĩa ciande-inĩ ciako; nako gagetagwo Mũheani-Kĩrĩra-wa-Kũgegania, Mũrungu-Mwene-Hinya, Ithe-wa-Andũ-wa-Tene-na-Tene, Mũnene-wa-Thayũ.
7Naguo ũhoro wa ũrĩa wathani wake ũgaikara ũkĩnenehaga, o na thayũ-rĩ, ndũrĩ hingo ũkehera gĩtĩ-inĩ gĩa ũthamaki kĩa Daudi, kana wehere ũthamaki-inĩ wake, nĩguo ũikare wĩkindĩire, na ũkehanda wega, na ũtũũre ũtiirĩrĩirũo na cira wa kĩhooto o na ũthingu, gwata rĩu nginya tene na tene. Wĩrutanĩria wa Jehova Mũnene wa Ita nĩguo ũgatũma maũndũ macio moneke.
8Mwathani atwarithĩirie Jakubu ndũmĩrĩri, nayo ĩgakinyĩrĩra Isiraeli.
9Na andũ othe nĩmakamenya ũhoro wayo, o andũ a Efiraimu, na arĩa matũũraga Samaria, o acio maaragia na rũtũrĩko na makomia ngoro ciao, makoiga atĩrĩ,
10Matubarĩ nĩmagũĩte, no ithuĩ tũgwaka na mahiga maicũhie; o nayo mĩkũyũ nĩĩtemetwo ĩkagũa thĩ, no ithenya rĩayo tũgwaka na mĩtarakwa.
11Tondũ ũcio Jehova nĩakaarahũra andũ arĩa marĩ ũthũ na Rezini makamokĩrĩre, na athugathuge amuku ao,
12nao nĩo Asuriata arĩa mamahĩtĩte mbere, na Afilisiti arĩa mamoimĩte na thutha, nao marĩe Isiraeli ta marĩ nyamũ yathamĩtie kanua ĩrĩane. Na rĩrĩ, o na harĩa gũtariĩ ũguo-rĩ, marakara make matirĩ marahũahũa; no rĩrĩ, guoko gwake no gũtambũrũkĩtio o na rĩu.
13No rĩrĩ, o na rĩu andũ matirĩ marahũgũkĩra ũcio wamahũrire, kana makarongoria Jehova Mũnene wa Ita.
14Tondũ ũcio Jehova nĩagatinia mũtwe, o na gĩcuthĩ, ciehere thĩinĩ wa Isiraeli, na atinie ithangũ rĩa mũnathi na itothua, o mũthenya ũmwe.
15Nake mũndũ ũrĩa mũkũrũ mũtĩĩku nĩwe ũtariĩ ta mũtwe wakuo, o nake mũnabii ũrĩa ũrutanaga ũhoro wa maheni nĩwe gĩcuthĩ gĩakuo.
16Nĩ gũkorũo atongoria a andũ aya nĩo mamahĩtithagia, o nao andũ arĩa matongoragio nĩo nĩmaninagwo.
17Tondũ ũcio Mwathani ndagakenio nĩ aanake ao, kana aiguĩre ciana ciao cia ngoriai tha, o na aka ao a ndigwa, nĩ gũkorũo mũndũ o mũndũ wao nĩamenete Ngai na nĩ mwĩki-naĩ, natuo tũnua twao tuothe twaragia maũndũ ma ũkĩgu. Na rĩrĩ, o na harĩa gũtariĩ ũguo-rĩ, marakara ma Jehova matirĩ marahũahũa; no rĩrĩ, guoko gwake no gũtambũrũkĩtio o na rĩu.
18Nĩ gũkorũo waganu ũrĩrĩmbũkĩte o ta mwaki, ũgacina cong’e o na mĩigua, ũkaminina biũ. Ĩĩ, ti-itherũ wakanĩte kũndũ kũrĩa gũtumanu kĩrĩti-inĩ, nayo ndogo yaguo ĩgathiĩ na igũrũ ta matu mathimbu mũno.
19Tondũ wa matũkũya ma Jehova Mũnene wa Ita, thĩ nĩĩcinĩtwo o gũcinwo biũ, nao andũ magatuĩka o ta ngũ cia mwaki; gũtirĩ mũndũ ũracaĩra mũrũ wa nyina.
20Mũndũ agetharagĩra irio na mwena wake wa ũrĩo, na atũũre arĩ o mũhũtu, o na arĩage indo iria irĩ mwena wake wa ũmotho, na ndahũne; nĩ kũrĩa makerĩaga, o mũndũ erĩe nyama ya guoko gwake we mwene.
21Manase akarĩa Efiraimu, o nake Efiraimu arĩe Manase, nao erĩ me hamwe mokĩrĩre Juda. Na rĩrĩ, o na harĩa gũtariĩ ũguo-rĩ, marakara ma Jehova matirĩ marahũahũa; no rĩrĩ, guoko gwake no gũtambũrũkĩtio o na rĩu.
Sign in to highlight verses and keep them in sync with the mobile app.