← All books
AMPKIKUYUKJVNIVNKJVNLTNRSV
1NINGĨ Jehova akĩnjĩra atĩrĩ, Wĩyoere kĩbaũ kĩnene, wandĩke igũrũ rĩakĩo na mwandĩkĩre ũrĩa ũhũthĩire kwandĩkwo nĩ andũ, wandĩke ũũ: Maheri-shalali-hashi-bazu;
2na niĩ ngĩkĩĩyoera aira ehokeku a kuona ũhoro ũcio, nao nĩ Uria mũthĩnjĩri-Ngai, na Zekaria wa Jeberekia.
3Thutha wa ũguo niĩ, mũnabii, ngĩkĩonana na mũtumia wakwa, nake akĩgĩa ihu, agĩciara kahĩĩ. Ningĩ Jehova akĩnjĩra atĩrĩ, Ta gatue Maheri-shalali-hashi-bazu.
4Nĩ gũkorũo o mbere kaana kau gatanamenya gwĩtana koige Baba-ĩ, kana Maitũ-ĩ, ũtonga wa Dameski, o na indo iria itahĩtwo Samaria, nĩigakorũo ithiĩtwo nacio, ikaigwo mbere ya mũthamaki wa Ashuri.
5Ningĩ Jehova akĩnjarĩria o rĩngĩ, akĩnjĩra atĩrĩ,
6Kuona atĩ andũ aya nĩmaregete maĩ ma Shilo, marĩa mathereraga mahoreire, magagĩkenera Rezini na mũrũ wa Remalia-rĩ,
7atĩrĩrĩ, Mwathani nĩekũmarehithĩrie maĩ ma rũũĩ rũa Farati, marĩa me hinya na makaingĩha, namo nĩ mũthamaki wa Ashuri o na riri wake wothe; nake nĩagathiĩ aiyũire mĩtaro yake yothe, o na oine o kuuna.
8Ningĩ akaharũrũka akinye Juda, akũiyũre guothe, na akũhĩtũke, akũiyũrĩrĩre o ta akinyĩte ngingo-inĩ ciakuo; ningĩ atambũrũkie mathagu make, maiyũre bũrũri waku o nginya ituri-inĩ ciaguo cia ũrĩa waramĩte, wee Imanueli.
9Atĩrĩrĩ, inyuĩ andũ a ndũrĩrĩ, ta ronjai o kũronja, no nĩmũkamemendwo; o na inyuĩ andũ a mabũrũri ma kũraya inyuothe-rĩ, ta tegai gũtũ; wĩnyuei mĩthiori, na no mũkamemendwo; wĩhotorei, na no mũkamemendwo.
10Ta ciranĩrai, no cira ũcio nĩũkaagio bata; ariai ũhoro, no ndũkarĩĩra; nĩ ũndũ Mũrungu e hamwe na ithuĩ.
11Nĩ gũkorũo Jehova aa’heire ũhoro ũyũ agwatĩirie mũno, na akĩndaara ndigathiĩ na mĩthiĩre ya andũ aya, akiuga ũũ:
12Atĩrĩrĩ, tigai kuuga, Tũrĩ athugundĩre ũgwati, o na harĩa andũ aya othe maroiga ũũ: Tũrĩ athugundĩre ũgwati. Menyai mũgwatwo nĩ guoya ta ũrĩa ũmagwatĩte, kana mũmake nĩ ũndũ wa ũhoro ũcio.
13Jehova Mũnene wa Ita, nĩwe mũrĩtuaga mũtheru; na mũtue atĩ nĩwe mwagĩrĩirũo nĩ gwĩtigĩra, na atĩ nowe ũngĩmũmakia.
14Ningĩ nĩwe handũ hanyu haamũre ha kũũrĩra; no rĩrĩ, magatuĩka ihiga rĩa kũgũithania, o na rũaro rũa ihiga rĩa kũhĩngithania, harĩ andũ a nyũmba cia Isiraeli cierĩ, na atuĩke ta kĩana kĩa rũrigi gĩa kũnyitana, o na mũtego, harĩ andũ arĩa matũũraga Jerusalemu.
15Nao andũ aingĩ thĩinĩ wao nĩmakahĩngwo magũe, moinĩkange, na magwatio, manyitwo.
16Atĩrĩrĩ, ta kũnja mohoro macio maandĩkĩtwo ma ũtaarani ũmohe, ũmacinĩrĩre rũũri matuĩke kĩrĩra harĩ arutwo akwa.
17Niĩ ndĩrĩetagĩrĩra Jehova, o we ũrĩa ũhithĩte andũ a nyũmba ya Jakubu ũthiũ wake, njikarage ndĩmũcũthĩrĩirie.
18Atĩrĩrĩ, thĩinĩ wa Isiraeli-rĩ, nĩ niĩ, na ciana iria Jehova aa’heire, tũtuĩkĩte marũũri o na morirũ ma kũgegania moimĩte he Jehova Mũnene wa Ita, ũrĩa ũtũũraga kĩrĩma-inĩ gĩa Zayuni.
19Na hĩndĩ ĩrĩa magakwĩra ũũ: Atĩrĩrĩ, thiĩ ũgatuĩrie ũhoro harĩ andũ arĩa me na roho ũragũraga, o na harĩ ago arĩa maaragia na mĩgambo mĩceke makĩng’ung’uraga-rĩ, morie atĩrĩ, Githĩ ti kaba andũ marongoragie Ngai wao arĩ we? Anga nĩ wega kũragũria andũ arĩa maakuire nĩ ũndũ wa arĩa me muoyo?
20Nĩ kaba mũtuĩrie watho-inĩ wa Ngai, o na ũira-inĩ wake! Ũguo nĩguo o nao makoiga, maakorũo matarĩ mwĩthoko wa kũrokerũo nĩ mũnyaka.
21Nao nĩmakagera bũrũri ũyũ wao maiguĩte ũũru na makahũta; na nĩgũgakinya atĩrĩ, atĩ maahũta-rĩ, nĩ kũrakara makarakara marume mũthamaki wao, o na Ngai wao; namo mothiũ mao maamaroria na igũrũ,
22o na kana maacũthĩrĩria na thĩ, atĩrĩrĩ, no mĩnyamaro makona, o na nduma, na marundurundu moimanĩte na gũtangĩka kũnene; tondũ magakorũo maingatĩtwo makarorio nduma-inĩ ĩo ndumanu.
Sign in to highlight verses and keep them in sync with the mobile app.