← All books
AMPKIKUYUKJVNIVNKJVNLTNRSV
1Hĩ! Kaĩ andũ arĩa matuaga matuĩro matarĩ ma kĩhooto marĩ na haaro-ĩ, o hamwe na arĩa matũire maandĩkaga maũndũ ma kũhinyanĩrĩria!
2Mekaga ũguo nĩguo mahotomie cira wa arĩa akĩa, matigatuĩrũo cira na kĩhooto, o na matunye athĩni a andũ akwa kĩhooto kĩao, nĩguo aka a ndigwa matuĩke ta itaha rĩao rĩrĩa metahĩire, o na manyite ciana cia ngoriai na hinya ta igwatĩtwo mĩgwate!
3Rĩu-rĩ, mũgagĩĩka atĩa mũthenya ũrĩa mũgakorererũo, o mũthenya ũrĩa gũgakira ihooru riumĩte o kũndũ kũraya? Mũkorĩra harĩ ũ amũteithie? O naguo ũtonga wanyu-rĩ, mũkaũhithia ũ?
4Gũtikoneka wa gwĩka tiga o mainamĩrĩre me hamwe na andũ arĩa ohe, kana magũe thĩ thĩinĩ wa arĩa makuĩte. Na rĩrĩ, o na harĩa gũtariĩ ũguo-rĩ, marakara ma Jehova matirĩ marahũahũa; no rĩrĩ, guoko gwake no gũtambũrũkĩtio o na rĩu.
5ATĨRĨRĨ, Mũashuri, wee rũthanju rũrĩa njamũranaga naruo ndakarĩte, o wee thiarĩ ũrĩa ngũthanaga naguo ngwatĩtwo nĩ mathũgũta!
6Ngamũtũma akahũre rũrĩrĩ rũrĩa rũmenete Ngai, o na ahũre andũ arĩa matũmaga ndũkũyane, aheetwo watho wa atĩ atahane, na agwatane mĩgwate, na amarangĩrĩrie thĩ o ta ndoro ya njĩra-inĩ.
7Nowe ti ũguo wiki acirĩire gwĩka, kana ngoro yake ĩgatanya gwĩka o ũndũ ũcio wiki; no makĩria ũndũ ũrĩa atanyĩte na ngoro yake nĩ kũninana biũ, na ang’ũrie ndũrĩrĩ gĩkundi.
8Nĩ ũndũ oigaga atĩrĩ, Githĩ anene akwa othe ti athamaki?
9Githĩ Kalino rĩtiĩkĩtwo o ta Karikemishi? O narĩo Hamathu-rĩ, githĩ rĩtiĩkĩtwo o ta Aripadi? Narĩo Samaria githĩ rĩtiĩkĩtwo o ta Dameski?
10Ti-itherũ o ta ũrĩa guoko gwakwa kwĩnyitĩire mothamaki macio meigagĩra mĩhianano ya kũhoyũo, o macio maarĩ mĩhianano mĩacũhie mĩingĩ kũrĩ ĩrĩa ya Jerusalemu o na ya Samaria-rĩ,
11githĩ ndigagĩĩka Jerusalemu na mĩhianano yarĩo ya kũhoyũo o ta ũrĩa njĩkĩte Samaria na mĩhianano yarĩo ya kũhoyũo?
12Tondũ ũcio nĩgũgakinya atĩrĩ, atĩ rĩrĩa Mwathani arĩkĩtie wĩra wothe ũrĩa akarutĩra kĩrĩma-inĩ gĩa Zayuni igũrũ o na Jerusalemu-rĩ, nĩngarĩhanĩria maũndũ marĩa moimanĩte na meciria ma mwĩtĩo wa ngoro ya mũthamaki ũcio wa Ashuri, o na marĩa moimanĩte na ũrĩa eyonaga ta ekĩrĩirũo nĩ ũndũ wa ũcamba wake.
13Nĩ gũkorũo oigire atĩrĩ, Ũndũ ũcio ndĩwĩkĩte na hinya wa guoko gwakwa niĩ mwene, na ũũgĩ wakwa, nĩ ũndũ ndĩ mũũhĩgĩrĩru maũndũ. Mĩhaka ya andũ nĩ niĩ ndĩmĩeheretie ngamatunya mĩthithũ yao, o nao arĩa maikaragĩra itĩ cia athamaki ngamagũithia o ta ũrĩa njamba ĩĩkaga;
14o naguo ũtonga wa andũ-rĩ, guoko gwakwa nĩkũũhambatĩirie gũkaũnyita, o ta ũrĩa mũndũ ahambatagĩria nyũmba ya nyoni akamĩnyita, o na ta ũrĩa mũndũ acokagĩrĩria matumbĩ marĩa matirikĩtwo, ũguo noguo na niĩ njokereirie andũ a thĩ yothe. Na hatirĩ mũndũ o na ũmwe wambararĩtie ithagu, kana agatumũra kanua, kana agakunia.
15Ithanwa-rĩ, githĩ rĩakĩhota gwĩtĩĩra mũndũ ũrĩa ũtemaga mĩtĩ narĩo? O naguo mũthumeno-rĩ, githĩ wakĩhota kwĩneneheria mũndũ ũrĩa ũũgucagia? Kaĩ rũthanju rũngĩkĩhiũria andũ arĩa maruoyaga, kana thiarĩ woe mũndũ atakĩrĩ mũtĩ!
16Tondũ ũcio Mwathani, o we Jehova Mũnene wa Ita, nĩagatwarithĩria andũ ake arĩa anoru ũhĩnju, narĩo ithenya rĩa gũtũũra mahubĩtwo nĩ riri wake-rĩ, nĩ mwaki magaakĩrio wa gũcinana ũkĩrĩrĩmbũka.
17Ũtheri wa Isiraeli nĩguo ũgatuĩka mwaki, nake Ũrĩa wake Mũtheru arĩrĩmbũke, naguo mwaki ũcio ũcine cong’e o na mĩigua ũmĩnine biũ o mũthenya ũmwe;
18naguo riri wa kĩrĩti gĩake aũninũkie, hamwe na wa mũgũnda wake ũrĩa ũciaraga maciaro maingĩ, aũnine roho o na mwĩrĩ, ũhwererekere ũhuke o ta mũndũ mũrũaru.
19Nayo mĩtĩ ya kĩrĩti gĩake ĩrĩa ĩgatigario nĩĩkanyiha, o nginya ĩhote kwandĩkwo ũrĩa ĩigana nĩ kaana.
20Na nĩgũgakinya atĩrĩ, mũthenya ũcio, atĩ andũ arĩa magatigara a Isiraeli, o na arĩa magakorũo mahonokete a nyũmba ya Jakubu, matigacoka kwĩgiritania na ũcio wamahũrĩte, no makegiritania na Jehova na ma o ma, o we Ũrĩa Mũtheru wa Isiraeli.
21Nĩ matigari magacokerera Mũrungu ũrĩa ũrĩ hinya, o arĩa magatigara a Jakubu.
22Amu-rĩ, o na harĩa andũ aku a Isiraeli maingĩhĩte o ta mũthanga wa iria rĩrĩa inene-rĩ, matigari mao nomo magacoka kwao; ti-itherũ nĩgũciranĩirũo atĩ kũhukanio, naguo ũhoro ũcio wonanie atĩ itua rĩake nĩ rĩa kĩhooto ki.
23Nĩ ũndũ Mwathani, o we Jehova Mũnene wa Ita, nĩagatũma ithirĩro rĩoneke gũkũ thĩ guothe, rĩringaine na ũrĩa gũtuĩtwo.
24Tondũ ũcio Mwathani, o we Jehova Mũnene wa Ita, ekuuga ũũ: Atĩrĩrĩ, inyuĩ andũ akwa arĩa mũtũũraga Zayuni, menyai mwĩtigĩre Mũashuri, o na angĩkũgũtha na rũthanju, na oe thiarĩ wake na igũrũ akũhũre o ta ũrĩa gwekagwo Misiri.
25Nĩ gũkorũo nĩ kahinda kanini gatigarĩte mũninĩrũo mathũgũta makwa, namo marakara makwa mamacokerere mamanine.
26Ningĩ Jehova Mũnene wa Ita nĩagatũma okĩrĩrũo ahũrũo na hinya mũno, o ta ũrĩa gwekirũo rĩrĩa Amidiani moragĩirũo rũaro-inĩ rũa ihiga rũa Orebu; naruo rũthanju rũake arũtambũrũkie igũrũ rĩa iria, aruoete na igũrũ o ta ũrĩa gwekirũo Misiri.
27Na nĩgũgakinya atĩrĩ, mũthenya ũcio, atĩ mũrigo wake nĩũgakuuma kĩande, na mũtĩ wake wa ngingo ũkuume ngingo, naguo mũtĩ ũcio wa ngingo nĩũkaninwo nĩ ũndũ wa ũrĩa wee ũitĩrĩirio maguta.
28Atĩrĩrĩ, nĩokĩte agakinya Aiathu, agereire Migironi; nakuo Mikimashi nĩkuo aigĩte mĩrigo yake;
29nĩmahungurĩire mũkuru-inĩ, magathiĩ gũikara Geba. Rama nĩ kũinaina kũrainainwo, narĩo Gibea rĩa Saulu nĩ muunĩko wĩ kuo.
30Atĩrĩrĩ, wee mwarĩ wa Galimu, anĩrĩra, ũkayũrũrũke mũno! O nawe Laishi-rĩ, ta thikĩrĩria! Ningĩ o nawe Anathothu, ta amũkĩria!
31Madimena nĩ kũũra kwĩyũrĩirũo, ningĩ andũ arĩa matũũraga Gebimu nĩmarecokanĩrĩria more.
32Mũthenya o ro ũyũ wa ũmũthĩ-rĩ, ekũrũgama o kũu Nobu. Kĩrĩma kĩa mwarĩ wa Zayuni, o gĩkĩ kĩa Jerusalemu-rĩ, arakĩũgita agĩgĩthukagĩria guoko.
33Atĩrĩrĩ, Mwathani, o we Jehova Mũnene wa Ita, akamũcuura honge na ũndũ wĩ itua-nda, nacio njamba ciake iria irĩ ciũga ndaya itemengwo igũithio, o nao arĩa metũũgĩrĩtie manyihio.
34Ningĩ kĩrĩti-inĩ kũrĩa gũtumanu gũgatemengwo na kĩgera, o nakuo Lebanoni kũgũithanio nĩ ũrĩa wĩ hinya mũno.
Sign in to highlight verses and keep them in sync with the mobile app.