← All books
AMPKIKUYUKJVNIVNKJVNLTNRSV
1O na ningĩ, Roho akĩnjoya na igũrũ, akĩndwara kĩhingo-inĩ kĩa nyũmba ya Jehova kĩa mwena wa irathĩro, o kĩu kĩrorete na kũu mwena ũcio wa irathĩro, na atĩrĩrĩ, hau mũromo-inĩ wa kĩhingo kĩu hagĩkorũo harĩ andũ mĩrongo ĩĩrĩ na atano; na thĩinĩ wao ngĩona Jaazania wa Azuri, na Pelatia wa Benaia; nao maarĩ anene a rũrĩrĩ.
2Nake akĩnjĩra atĩrĩ, Mũrũ wa mũndũ, aya nĩo mathugundaga waganu, na nĩo mahotomagia macira itũũra-inĩ rĩrĩ,
3ningĩ nĩo moigaga atĩrĩ, Ihinda ti ikinyu; nĩtwĩakĩrei nyũmba! Itũũra rĩrĩ nĩrĩo nyũngũ ya kũruga, na ithuĩ twĩ nyama.
4Tondũ ũcio ratha ũhoro ũmakoniĩ, wee mũrũ wa mũndũ; ratha.
5Ngĩgĩcoka ngĩgũĩrũo nĩ Roho wa Jehova, nake akĩnjĩra atĩrĩ, Aria, uuge atĩ Jehova oigĩte ũũ: Ũguo nĩguo muugĩte, inyuĩ nyũmba ya Isiraeli, nĩ ũndũ nĩnjũĩ maũndũ marĩa mũcũranagia meciria-inĩ manyu.
6Inyuĩ nĩ inyuĩ mũtũmĩte andũ arĩa moragĩtwo maingĩhe itũũra-inĩ rĩrĩ, na mũgatũma andũ arĩa moragĩtwo maiyũre njĩra-inĩ ciarĩo.
7Tondũ ũcio Mwathani Jehova oigĩte ũũ: Andũ anyu arĩa moragĩtwo, o acio mũgũithĩtie gatagatĩ karĩo-rĩ, nĩo nyama, narĩo itũũra rĩrĩ nĩrĩo nyũngũ ya kũruga. No rĩrĩ, inyuĩ nĩmũkarutũrũrũo muume kuo.
8Gwĩtigĩra nĩmwĩtigĩrĩte rũhiũ rũa njora, na niĩ nĩ kũrehithie ngarehithie rũhiũ rũu rũa njora rũmũkore; ũguo nĩguo Mwathani Jehova oigĩte.
9Na nĩngamũrutũrũra ndĩmuumie itũũra-inĩ ndĩmũneane moko-inĩ ma andũ a ndũrĩrĩ, na ndĩmũhingĩrie matuĩro ma cira.
10Ningĩ nĩmũkagũa mũũragĩtwo na rũhiũ rũa njora, na niĩ ndĩmũcirithĩrie o kũu mũhaka-inĩ wa Isiraeli; na nĩmũkamenya atĩ niĩ nĩ niĩ Jehova.
11Itũũra rĩrĩ-rĩ, rĩtigatuĩka nyũngũ yanyu ya kũruga, o na kana inyuĩ mũtuĩke nyama thĩinĩ warĩo; ngamũtuĩra cira o kũu mũhaka-inĩ wa Isiraeli;
12na nũmũkamenya atĩ niĩ nĩ niĩ Jehova, amu mũtithiĩte na mĩthiĩre ĩringaine na irĩra cia watho wakwa wa kũrũmĩrĩrũo, o na kana mũkahingia matuĩro makwa ma macira; no rĩrĩ, mwĩkĩte maũndũ maringaine na irĩra iria ituĩtwo nĩ ndũrĩrĩ iria imũrigicĩirie.
13Na gũgĩkinya atĩrĩ, atĩ hĩndĩ o ĩo ndarathaga ũhoro, Pelatia wa Benaia agĩkua. Hĩndĩ ĩo ngĩĩgũithia ngĩturumithia ũthiũ thĩ, ngĩanĩrĩra na mũgambo mũnene ngiuga atĩrĩ, Hĩ, Mwathani Jehova! Anga nĩũkũninũkia matigari ma Isiraeli o kũninũkia?
14Nayo ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
15Mũrũ wa mũndũ, andũ anyu, naguo ũguo nĩ ta kuuga andũ anyu o arĩa a mũhĩrĩga waku, o na andũ othe a nyũmba ya Isiraeli-rĩ, othe hamwe nĩmerĩtwo nĩ andũ arĩa matũũraga Jerusalemu ũũ: Thengerai Jehova mũmũthiĩ haraya; ithuĩ nĩ ithuĩ tũheetwo bũrũri ũyũ ũtuĩke witũ tene na tene.
16Tondũ ũcio uga atĩrĩ, Mwathani Jehova oigĩte ũũ: O na gwatuĩka nĩndamarindũrire ngĩmatwarithia kũndũ kũraya mũno, ngĩmaharaganĩria ndũrĩrĩ-inĩ, ningĩ o na gwatuĩka atĩ nĩndamahurunjĩire mabũrũri-inĩ-rĩ, nĩ niĩ nduĩkĩte handũ hao harĩa haamũre matukũ maya manyinyi marĩ kũu mabũrũri-inĩ macio mathiĩte.
17Tondũ wa maũndũ macio kiuge atĩrĩ, Mwathani Jehova oigĩte ũũ: Nĩngamũcokereria ndĩmũrute ndũrĩrĩ-inĩ, o na ndĩmũũnganie ndĩmũrute mabũrũri-inĩ macio mwahurunjĩirũo, njoke ndĩmũhe bũrũri wa Isiraeli.
18Nao nĩmagacoka kuo, meherie indo ciakuo ciothe cia gũthũũrũo mũno, o na indo ciothe iria irĩ thahu macieherie kuo.
19Na nĩngamahe ngoro ĩmwe, o na ndĩmekĩre roho ũngĩ mwerũ thĩinĩ wao; na ndĩmehererie ngoro ĩrĩa yũmĩte ta ihiga yume mĩĩrĩ-inĩ yao, njoke ndĩmahe ngoro ĩngĩ njororo;
20nĩ getha mathiage na mĩthiĩre ya kũrũmĩrĩra irĩra cia watho wakwa wa kũrũmĩrĩrũo, o na mamenyagĩrĩre mawatho makwa, nĩguo mamahingagie; nao nĩmagacoka gũtuĩka andũ akwa, na niĩ nduĩke Ngai wao.
21No rĩrĩ, ha ũhoro wa andũ arĩa mathiaga na mĩthiĩre ya kwĩrirĩria na ngoro ciao maũndũ mao marĩa mathũũre, o na marĩa marĩ thahu-rĩ, nĩ gũtũma ngatũma macokererũo nĩ maũndũ ma mĩthiĩre ĩo yao; ũguo nĩguo Mwathani Jehova oigĩte.
22Hĩndĩ ĩo Akerubi makĩambararia mathagu mao, namo magũrũ macio ma ngari magĩkorũo me mĩena-inĩ yao; naguo riri wa Ngai wa Isiraeli waikarĩte igũrũ rĩao.
23Ningĩ riri ũcio wa Jehova ũkĩambata ũkiuma kũu itũũra-inĩ gatagatĩ, ũkĩrũgama kĩrĩma igũrũ o kĩu kĩrĩ mwena wa irathĩro wa itũũra rĩu.
24Nake Roho agĩcoka kĩnyambararia na igũrũ; nakĩo kĩoneki-inĩ kĩu gĩakwa ngĩona ta ndwarĩtwo nĩ Roho wa Ngai, nake akĩnginyia kũrĩ andũ arĩa maatũire marindũrĩtwo, o acio maatũire kũu bũrũri wa Kalidei. Nakĩo kĩoneki kĩu ndonete gĩgĩkĩnjũrĩra.
25Hĩndĩ ĩo ngĩgĩcoka ngĩaria na andũ acio maatũire marindũrĩtwo, ngĩmera maũndũ mothe marĩa Jehova aanguũrĩirie.
Sign in to highlight verses and keep them in sync with the mobile app.