← All books
AMPKIKUYUKJVNIVNKJVNLTNRSV
1Hĩ! Na arĩ korũo mũtwe wakwa waiyũra maĩ matheri, o namo maitho makwa matuĩke gĩthima gĩa gũita maithori, nĩ getha ndĩrage ũtukũ na mũthenya nĩ ũndũ wa andũ arĩa moragĩtwo a mwarĩ wa andũ akwa!
2Na arĩ korũo ndĩ o kũu werũ-inĩ njikarĩte gĩthũnũ-inĩ kĩa agendi, nĩ getha nyume harĩ andũ akwa, ’thiĩ ndĩmeherere! Nĩ ũndũ-rĩ, othe nĩmatuĩkĩte atharia, na magatuĩka kĩũngano kĩa andũ arĩa magarũkanaga na ũrĩa-ng’ũũrũ.
3Mahacaga nĩmĩ ciao magacitua ta arĩ ũta wao wa kũhenania, nao makagĩa na hinya bũrũri ũyũ, no nduumanĩte na ũhoro-wa-ma o na hanini; nĩ ũndũ makĩragĩrĩria gwĩka ũũru mategũtigithĩria, na matimenyanĩte na niĩ; ũguo nĩguo Jehova ekuuga.
4Inyuothe-rĩ, mũndũ o mũndũ nĩerĩithagie ũrĩa ũngĩ, na mũndũ ndakehoke mũrũ wa ithe o na ũrĩkũ; nĩ gũkorũo mũrũ wa ithe na mũndũ nĩakamũũhĩgĩrĩra na wara, nao andũ othe macambanie, o mũndũ na mũndũ ũrĩa ũngĩ;
5nao mũndũ o mũndũ ahenagie ũrĩa ũngĩ; na matikaaria ndeto cia ma, tondũ mamenyeretie nĩmĩ ciao o kwaria ndeto cia maheni, na mĩhang’o yao no ya gwĩka maũndũ ma waganu.
6Ũikaro waku-rĩ, ũtũire ũcigĩrĩirio nĩ maheni; nao ahenania acio nĩmaregete kuumĩrania ngoro na niĩ; ũguo nĩguo Jehova ekuuga.
7Tondũ ũcio Jehova Mũnene wa Ita ekuuga ũũ: Nĩ kũgeria ngamageria ta marĩ kĩndũ gĩtweketio na mwaki, ’menye kana hihi nĩharĩ ũndũ ũngĩ ingĩĩka nĩ ũndũ wa maũndũ marĩa maanekwo nĩ mwarĩ wa andũ akwa.
8Nĩmĩ ciao itariĩ ta mĩguĩ ya kũũragana, amu ciaragia o maheni matheri, mũndũ akaarĩria ũrĩa ũngĩ ndeto ta cia thayũ na kanua, no ngoro-inĩ yake aikaraga amuoheirie amũgere ngero.
9Hĩ! Githĩ ndakĩaga kũmaherithia nĩ ũndũ wa maũndũ macio? Ũguo nĩguo Jehova ekũũria. Ningĩ-rĩ, githĩ ngoro yakwa yakĩaga kwĩrĩhĩria harĩ rũrĩrĩ ta rũu?
10Atĩrĩrĩ, nĩ gũitĩka ngũitĩka kũrĩra ngĩgirĩkaga nĩ ũndũ wa irĩma, o na ũndũ wa ũrĩithio ũrĩa wĩ werũ-inĩ ndĩre kĩrĩro, nĩ ũndũ wa ũrĩa ũcinĩtwo biũ, o nginya gũkaaga mũndũ ũngĩtuĩkania kuo, o na kana mũndũ aigue ũhiũ ũkĩania kuo; nyamũ cia rĩera-inĩ o na nyamũ cia gĩthaka nĩ kũũra ciũrĩte, igethiĩra.
11Jerusalemu-rĩ, nĩngagũtua hĩba cia mahuti, gũtuĩke o gwa gũtũũrũo nĩ mbwe; o namo matũũra ma Juda ndũme makire ihooru, maage mũndũ o na ũmwe ũmatũũrĩte.
12Rĩu-rĩ, mũndũ ũrĩa mũũgĩ akĩrĩ ũrĩkũ, ũrĩa ũngĩhota kũmenya wega ũhoro ũyũ? Ningĩ-rĩ, nũ ũngĩkorũo aarĩirio na kanua ka Jehova, nĩ getha oimbũranĩre ũhoro ũyũ? Rĩu-rĩ, nĩ kĩ gĩgĩtũmĩte bũrũri ũcinwo biũ ũgatuĩka o ta werũ mũtheri, o nginya gũkaaga mũndũ ũngĩtuĩkania kuo?
13Jehova egũkiuga atĩrĩ, Gĩtũmi nĩ ũndũ nĩmatirikĩte watho wakwa ũrĩa ndamaathire, na makarega gwathĩkĩra uuge wakwa, o na kana makaũrũmĩrĩra;
14no rĩrĩ, marũmĩrĩire ũremi wa ngoro ciao o ene, o na makarũmĩrĩra Mabaali, kũringana na maũndũ marĩa maamenyeririo nĩ maithe mao.
15Tondũ ũcio, Jehova Mũnene wa Ita, o we Ngai wa Isiraeli, ekuuga ũũ: Atĩrĩrĩ, nĩ kũrĩithia ngarĩithia andũ acio, o aya a rũrĩrĩ rũrũ, mũtĩ wa ũrũrũ, o na ndĩmahe maĩ marũrũ manyue.
16O na ningĩ ndĩmaharaganĩrie ndũrĩrĩ-inĩ iria matoĩ o ene o na kana maithe mao, njoke ndĩmoimie rũhiũ rũa njora thutha, o nginya ndĩmanine o kũmanina biũ.
17Ningĩ Jehova Mũnene wa Ita ekuuga ũũ: Wĩcũraniei ũhoro wanyu, mũcoke mwĩte atumia arĩa marĩraga na kĩgi, nĩ getha moke, ningĩ mũrekerie atumia arĩa ogĩ andũ metwo, nĩ getha o nao moke;
18nao merũo mahiũhe, nĩguo magwate gũtũrĩrĩra, nĩ getha maitho maitũ o namo magwate gũita maithori, o nacio imone ciitũ cia maitho igwate kũnyũrũrũka maĩ.
19Nĩ gũkorũo mũgambo wa kĩrĩro nĩũraiguwo na kũu Zayuni, ũkiuga atĩrĩ, Hĩ! Kaĩ tũrĩ aanange-ĩ! Tũrĩ aconorithie mũno, nĩ ũndũ tũrĩ aingate tũkarutwo bũrũri witũ, o na tũkarutũrũrũo tuume matũũra-inĩ maitũ.
20No rĩrĩ, ta thikĩrĩriai kiugo kĩa Jehova, inyuĩ atumia aya, na mũreke ndeto cia kanua gake imũtonye matũ, o nao airĩtu anyu mũmamenyerie kũrĩra; ningĩ inyuĩ atumia othe o mũtumia arute ũrĩa ũngĩ mũcakayo.
21Nĩ gũkorũo gĩkuũ nĩ kĩambatu gĩgakinya o ndirica-inĩ cia nyũmba ciitũ, o na gĩgatonya nyũmba ciitũ cia ũnene; nacio ciana ciitũ ininĩirũo o nja, o nao aanake aitũ makaninĩrũo ing’aratua-inĩ.
22Jehova egũkiuga atĩrĩ, Aria uuge ũũ: Atĩrĩrĩ, ciimba cia andũ ikagũa thĩ baraganya-inĩ kũndũ guothe, ituĩke o ta rũrua, o na kana ta tũmagira tũrĩa tũtigagwo nĩ mũgethi; na gũtirĩ mũndũ ũgaciũngania.
23Ningĩ Jehova ekuuga ũũ: Mũndũ ũrĩa mũũgĩ-rĩ, nĩatige kwĩgatha nĩ ũndũ wa ũũgĩ wake, kana mũndũ karau egathe nĩ ũndũ wa hinya ũrĩa e naguo, o na kana gĩtonga kĩĩgathe nĩ ũndũ wa ũtonga wakĩo;
24no rĩrĩ, mũndũ ũrĩa ũkwĩgatha, nĩegathage nĩ ũndũ wa ũhoro ũyũ wa atĩ nĩnyumĩranĩtie ngoro nake, na aka’menya atĩ nĩ niĩ Jehova, o niĩ njĩkaga maũndũ ma ũtugi, na ngatuanĩra cira na kĩhooto, o na ngarũmia maũndũ ma ũthingu gũkũ thĩ; nĩ ũndũ Jehova ekuuga atĩrĩ, Maũndũ macio nĩmo mangenagia.
25Atĩrĩrĩ, Jehova ekuuga ũũ: Matukũ nĩmagoka marĩa ngaherithia andũ othe aruu arĩa matuĩkĩte ta matarĩ aruu,
26’herithie andũ a Misiri, na a Juda, na a Edomu, na ciana cia Amoni o na andũ a Moabi, o na arĩa matuagĩrĩrũo, arĩa matũũraga werũ-inĩ; nĩ gũkorũo andũ a ndũrĩrĩ icio ciothe matũũraga matarĩ aruu, o nao andũ othe a nyũmba ya Isiraeli magatũũra matarĩ aruu ngoro.
Sign in to highlight verses and keep them in sync with the mobile app.