← All books
AMPKIKUYUKJVNIVNKJVNLTNRSV
1Nĩ ũndũ atĩrĩ, Mwathani, Jehova Mũnene wa Ita, nĩekwehereria andũ a Jerusalemu, o na a Juda, kĩrĩa kĩmatiiragĩrĩra, o na rũthanju rũrĩa metirimagia naruo, naguo ũguo nĩ ta kuuga amehererie mwĩhoko wothe wa irio na maĩ;
2o na amehererie mũndũ o wothe wĩ hinya, na mũndũ wa ita, na mũciri, na mũnabii, na mũragũri, na mũthuri wa kĩama,
3na mũnene wa athigari mĩrongo ĩtano, na mũndũ ũrĩa mũtĩĩku, na mũheani kĩrĩra, na mũthingi wa ithitũ, o na mũndũ mũgo mũũgĩ.
4Ciana nĩcio ngatua anene ao, na maathagwo nĩ tũkenge.
5Ningĩ andũ nĩmakahinyĩrĩrio, o mũndũ ahinyagĩrĩrio nĩ ũrĩa ũngĩ, na ningĩ o mũndũ ahinyagĩrĩrio nĩ mũndũ wa itũũra rĩao; mwana nĩakang’athĩria mũthuri wa kĩama, o nake mũndũ ũrĩa ũtarĩ itarĩri okĩrĩre mũndũ ũrĩa mũtĩĩku.
6Na rĩrĩ, mũndũ angĩkanyita mũrũ wa ithe arĩ gwa ithe mũciĩ, amwĩre ũũ: Atĩrĩrĩ, wee wĩ na nguo, tuĩka mũtwathi, na ũreke kũndũ gũkũ kwanangĩtwo kũgĩe watho-inĩ waku-rĩ,
7mũthenya ũcio nĩ kwanĩrĩra akaanĩrĩra oige atĩrĩ, Ndigũtuĩka mũhonania, nĩ gũkorũo gwakwa mũciĩ gũtirĩ irio, o na kana nguo; mũtikũndua mwathi wa kĩrĩndĩ.
8Amu Jerusalemu nĩ kũmomore, nakuo Juda gũkaanangĩka, nĩ gũkorũo mĩario ya nĩmĩ ciao, o na maũndũ marĩa mekaga, no ma gũũkĩrĩra Jehova, nĩguo mathirĩkie maitho make macio me riri makĩonwo.
9Nakĩo gĩthiithi kĩao nĩkĩo kĩonanagia ũrĩa matariĩ, gĩkamoimbũra, na mehia mao makoimbũka o ta ma Sodomu, na matimahithe. Kaĩ ngoro ciao irĩ na haaro-ĩ! Nĩ gũkorũo nĩo merehereire ũũru o ene.
10Ha ũhoro wa mũndũ ũrĩa mũthingu-rĩ, ugai atĩ nĩakagaacĩra, nĩ gũkorũo arĩa athingu makarĩaga maciaro ma maũndũ mao marĩa maaneka.
11Hĩ! Kaĩ mũndũ ũrĩa mwaganu arĩ na haaro-ĩ! Ũcio nĩ kuona akona ũũru, nĩ gũkorũo mũcara ũrĩa ũringaine na wĩra wa moko make noguo akaheo.
12Naho ha ũhoro wa andũ akwa-rĩ, ciana nĩcio imahinyagĩrĩria, na magaathagwo nĩ andũ-a-nja. Atĩrĩrĩ, wee rũrĩrĩ rũakwa, andũ arĩa magũtongoragia nĩo makũhĩtithagia, na magathũkia mĩthiĩre ĩrĩa ũthiaga nayo.
13Jehova nĩ mwarahũku nĩguo arũanĩrĩre, na akarũgama acirithie ndũrĩrĩ.
14Jehova nĩwe ũkagwata gũcirithia athuri a andũ ake, o na anene ao, amere atĩrĩ, Inyuĩ nĩ inyuĩ mũrĩĩte mũgũnda wene wa mĩthabibu, o nacio indo iria mũtahĩte athĩni irĩ nyũmba cianyu.
15Atĩrĩrĩ, mũhehenjaga andũ akwa na mũkamendeera mothiũ ma arĩa athĩni nĩ ũndũ kĩ? Ũguo nĩguo Mwathani, Jehova Mũnene wa Ita ekũũria.
16O na ningĩ atĩrĩ, Jehova oigĩte ũũ: Atĩrĩrĩ, tondũ wa ũrĩa airĩtu a Zayuni marĩ a mwĩĩkĩrĩro, na mathiaga magucĩtie ngingo, na makagĩa na uuhi wa maitho, na magathiĩ magĩkinyaga na raarĩ, na magĩcingiragia njingiri cia magũrũ mao-rĩ,
17Mwathani nĩagatũma airĩtu acio a Zayuni magĩe na kĩronda ruototia-inĩ rũao, ningĩ Jehova amaguũrie iraĩro ciao.
18Mũthenya ũcio-rĩ, Mwathani nĩagathengia riri wa nyarũrũng’a ciao, na ciũma ciao cia mĩtwe, na mathaga marĩa mehacĩte ta mweri,
19na ndebe ciao cia matũ, na ituro cia moko, na mabuibui mao,
20o na itambaya ciao cia mĩtwe, na irengeri cia magũrũ, na mĩĩhotoro, o na tũthandũkũ twa maraciĩ na ithitũ cia riri,
21na icũhĩ cia ciara o na cia maniũrũ,
22na nguo ciao cia gũthiĩ gĩathĩ-inĩ, na iria ndaya, na marĩthũ, o na tuondo twao twa riri,
23na icicio cia kwĩrora, na nguo cia gatani njega, o na iremba ciao, na matama mao ma ũthiũ.
24Na nĩgũgakinya atĩrĩ, atĩ ithenya rĩa mahuti marĩa manungaga wega, no indo mbuthu ikoneka ho, narĩo ithenya rĩa mwĩhotoro mwega hagĩe mũhĩndo, narĩo ithenya rĩa njuĩrĩ njikie hagĩe kĩhara, narĩo ithenya rĩa nguo ya gĩthũri hagĩe tama wa ikũnia, narĩo ithenya rĩa ũthaka wa mwĩrĩ hagĩe gũcinanwo na ruoro.
25Andũ aku arũme magaitwo thĩ na rũhiũ rũa njora, nao andũ aku arĩa marĩ hinya maninĩrũo ita-inĩ.
26O nacio ihingo-inĩ cia Zayuni nĩgũgacakayũo na kũrĩrũo, narĩo itũũra rĩu rĩgatigwo o ro ũguo rĩkirĩte ihooru, o na rĩikare o rĩmomoretwo rĩkagũithio thĩ.
Sign in to highlight verses and keep them in sync with the mobile app.