← All books
AMPKIKUYUKJVNIVNKJVNLTNRSV
1Na rĩrĩ, Ahabu aarĩ na ariũ mĩrongo mũgwanja o kũu Samaria. Nake Jehu agĩkĩandĩka marũa, akĩmatwarithia Samaria harĩ aathani a Jezireeli, o arĩa maarĩ athuri, o na arĩa maarĩ areri a ariũ a Ahabu kũu, akĩmera ũũ:
2Atĩrĩrĩ, marũa maya maamũkinyĩrĩra-rĩ, kuona atĩ ariũ a mwathi wanyu maikarĩte o kũu na inyuĩ, na mũkĩrĩ na ngari, na mbarathi, o na itũũra rĩirigĩtwo, o na indo cia mbaara-rĩ,
3cariai thĩinĩ wa ariũ a mwathi wanyu mũndũ ũrĩa mwega na mwagĩrĩru mũno, agakĩra arĩa angĩ othe, mũmũikarĩrie gĩtĩ gĩa ũthamaki gĩa ithe, na thutha wa ũguo mũrũĩrĩre mwathi ũcio wanyu.
4No andũ acio magĩĩtigĩra o mũno mũno ma, makiuga ũũ: Atĩrĩrĩ, kuona atĩ athamaki acio erĩ matiigana kũmwĩtiiria-rĩ, ithuĩ hihi tũgũkĩhota atĩa kũmwĩtiiria?
5Nake mũndũ ũrĩa warĩ mũrori wa maũndũ mothe ma nyũmba ya mũthamaki, na mũnene wa kũrora maũndũ ma itũũra, na athuri o nao, o na andũ arĩa maarĩ areri a ariũ acio a mũthamaki, makĩrekania kwĩ Jehu, makiuga atĩrĩ, Ithuĩ tũrĩ ndungata ciaku, na nĩtũrĩĩkaga maũndũ mothe marĩa ũrĩtwĩraga twĩke; tũtirĩ mũndũ o na ũmwe tũgũtua mũthamaki; ĩka o ta ũrĩa wee mwene ũkuona kwagĩrĩire.
6Hĩndĩ ĩo agĩcoka akĩmaandĩkĩra marũa o hĩndĩ ya kerĩ, akiuga atĩrĩ, Mũngĩkorũo mwĩ mwena wakwa, na mũkorũo nĩmũrĩiguaga mũgambo wakwa-rĩ, oyai ciongo cia andũ acio ariũ a mwathi wanyu, mũgoka kũrĩ niĩ, gũkũ Jezireeli, ihinda o ta rĩrĩ rũciũ. Na rĩrĩ, ariũ a mũthamaki, o andũ acio mĩrongo mũgwanja, maaikaraga na andũ arĩa maarĩ igweta a itũũra rĩu, nao nĩo maarĩ areri ao.
7Na gũgĩkinya atĩrĩ, atĩ marũa macio maamakinyĩra, makĩnyita ariũ a mũthamaki makĩmoraga, andũ acio othe mĩrongo mũgwanja, magĩĩkĩra ciongo ciao ngara-inĩ, magĩcitwarithia harĩ Jehu o kũu Jezireeli.
8Naho hagĩgĩthiĩ mũndũ wareketio akĩmũhe ũhoro, akiuga atĩrĩ, Nĩmaarehe ciongo cia ariũ a mũthamaki. Nake agĩkiuga atĩrĩ, Ciigei irũndo igĩrĩ, o hau mũromo-inĩ wa kĩhingo, nginya o rũciũ rũcinĩ.
9Na gũgĩkinya atĩrĩ, atĩ rũcinĩ akĩroka kuumagara, akĩĩra andũ, arũgamĩte harĩ o, ũũ: Atĩrĩrĩ, inyuĩ mwĩ na kĩhooto. Rĩu-rĩ, ti-itherũ nĩ niĩ ndathiire ndundu njũkĩrĩre mwathi wakwa, na ngĩmũũraga; no rĩrĩ, aya othe-rĩ, nũ ũmoragĩte?
10Menyai rĩu atĩ hatirĩ kiugo o na kĩmwe kĩa Jehova kĩa ũhoro ũrĩa aaririe ũkoniĩ nyũmba ya Ahabu kĩngĩaga kũhingio; nĩ ũndũ-rĩ, Jehova nĩekĩte ũndũ ũrĩa aaririe na kanua ka ndungata yake Elija.
11Tondũ ũcio Jehu agĩkĩũraga arĩa othe maatigarĩte kũu Jezireeli a nyũmba ya Ahabu, o na anene ake othe, o na arata ake arĩa maamenyaine nake mũno, o na athĩnjĩri-ngai ake, o nginya akĩaga kũmũtigĩria mũndũ o na ũmwe.
12Nake Jehu agĩũkĩra akĩĩeherera kũu, agĩthiĩ Samaria. Na aakinya nyũmba ĩrĩa arĩithi maamuragĩra mbũri ciao guoya, o kũu njĩra-inĩ-rĩ,
13agĩcemania na ariũ a ithe na Ahazia, mũthamaki wa Juda, akĩmoria atĩrĩ, Nĩ ĩnyuĩ a? Nao makĩmũcokeria atĩrĩ, Nĩ ithuĩ ariũ a ithe na Ahazia, na twatherera tũkageithie ciana cia mũthamaki, o na ciana cia mũtumia wa mũthamaki.
14Nake agĩkiuga atĩrĩ, Magwatei mĩgwate. Nao makĩmagwata mĩgwate, magĩcoka makĩmoragĩra irima-inĩ rĩrĩa rĩarĩ nyũmba ĩo yamuragĩrũo guoya. Nao maarĩ andũ mĩrongo ĩna na erĩ; na ndaigana kũmatigia o na ũmwe.
15Nake oima hau, agĩcemania na Jehonadabu wa Rekabu, okĩte kũmũtũnga; agĩkĩmũgeithia, akĩmũũria atĩrĩ, Ngoro yaku nĩĩ’thereire, o ta ũrĩa ngoro yakwa ĩthereire ngoro yaku? Nake Jehonadabu agĩcokia atĩrĩ, Ũguo noguo ĩtariĩ. Jehu agĩkiuga ũũ: Kũngĩkorũo nĩguo-rĩ, nengereria guoko. Nake agĩkĩmũnengereria guoko; hĩndĩ ĩo Jehu akĩmũhaicia ngari-inĩ yake matwarane.
16Nake akĩmwĩra atĩrĩ, Ũka tũthiĩ ũkone ũrĩa ndĩĩrutanĩirie nĩ ũndũ wa Jehova. Magĩkĩmũkuua na ngari ĩo ya Jehu.
17Na rĩrĩ, Jehu aakinya Samaria, akĩũraga andũ othe arĩa maatigarĩire Ahabu kũu Samaria, o nginya akĩnina nyũmba yake yothe o kũmĩnina biũ, o ta ũrĩa Jehova aaririe na kanua ka Elija.
18Ningĩ Jehu agĩkĩũnganithia andũ othe, akĩmera atĩrĩ, Ahabu aatungatĩire Baali hanini; no rĩrĩ, Jehu ekũmũtungatĩra o mũno ma.
19Tondũ ũcio njĩtĩrai anabii othe a Baali, o na andũ othe arĩa mamĩhoyaga, o na athĩnjĩri-ngai ayo othe; na mũtikareke mũndũ o na ũmwe wao aagwo; nĩ gũkorũo ndĩ na igongona inene mũno rĩa kũrutĩra Baali; na mũndũ o wothe wao ũrĩa ũrĩagwo ho, ndangĩrekwo atũũre muoyo. No rĩrĩ, Jehu ekire ũndũ ũcio na ũhinga, acirĩire kũnina andũ arĩa maainamagĩrĩra Baali mamĩhoe.
20Nake Jehu akiuga atĩrĩ, Tuai gĩathĩ gĩa atĩ kũgĩe ũũngano mũnene wamũrĩirũo Baali. Nao andũ magĩkĩhunjanĩria ũhoro ũcio.
21Nake Jehu akĩrekania Isiraeli guothe; nao andũ othe arĩa maahoyaga Baali magĩgĩthiĩ kuo, na tondũ ũcio gũtirĩ mũndũ o na ũmwe wao watigirũo atakinyĩte kuo. Magĩthiĩ magĩtonya nyũmba ya Baali; nayo nyũmba ĩo ya Baali ĩgĩkĩiyũrũo ituri ciayo ciothe.
22Nake agĩkĩĩra mũrori wa harĩa nguo cia nyũmba ĩo ciaigagwo ũũ: Atĩrĩrĩ, rutĩra ahoi othe a Baali nguo; nake akĩmarutĩra nguo.
23Nake Jehu, me na Jehonadabu wa Rekabu, magĩgĩtonya kũu nyũmba ya Baali; nake akĩĩra ahoi a Baali atĩrĩ, Rĩu ta tuĩriai wega hatigakorũo he mũndũ o na ũmwe wa ndungata cia Jehova wĩ haha hamwe na inyuĩ, tiga o ahoi a Baali oiki.
24Nao magĩgĩtonya nyũmba thĩinĩ nĩguo makarute magongona, o na mahaki ma njino. Na rĩrĩ, Jehu nĩaakorirũo eigĩire andũ mĩrongo ĩnana nja, akamera atĩrĩ, Mũndũ o na ũmwe wa andũ arĩa ndĩrĩneana moko-inĩ manyu angĩhonoka-rĩ, ũcio ũrekere ahonoke nĩwe ũrĩrutwo muoyo ithenya rĩa ũcio wĩhonoketie.
25Na gũgĩkinya atĩrĩ, atĩ kahinda o karĩa aarĩkirie kũruta mahaki marĩa ma njino-rĩ, Jehu akĩĩra arĩa maarangagĩra, o na anene a mbũtũ cia ita, atĩrĩ, Tonyai thĩinĩ mũmorage, na mũtikareke o na ũmwe wao arũke. Magĩkĩmoraga na hiũ cia njora; nao acio maaranganagĩra, o na anene a mbũtũ cia ita, makĩmaikia nja, magĩcoka magĩtonya kũndũ kũrĩa kwairigĩtwo kwa nyũmba ĩo ya Baali thĩinĩ.
26Nacio itugĩ iria ciahandĩtwo cia kũhoerũo Baali, o icio ciarĩ nyũmba thĩinĩ, magĩciruta na nja, magĩcicina.
27O nakĩo gĩtugĩ kĩa ihoero rĩa Baali magĩkiunanga magĩkĩgũithia thĩ, o nayo nyũmba ya Baali makĩmĩtharia, makĩmĩtua kĩoro o na ũmũthĩ.
28Ũguo nĩguo Jehu aaninire ũhoro wothe wa kũhoya Baali kũu Isiraeli.
29No rĩrĩ, ha ũhoro wa gũtigana na mehia ma Jeroboamu wa Nebati, marĩa ehirie na agĩtũma Aisiraeli o nao mehie nĩ ũndũ wamo-rĩ, Jehu ndaatiganire namo, naguo ũguo nĩ ta kuuga ndaatiganire na mĩhianano ya njaũ ya thahabu ĩrĩa yahandĩtwo Beth-eli o na Dani.
30Nake Jehova agĩkĩĩra Jehu atĩrĩ, Tondũ nĩwĩkĩte wega nĩ gwĩka maũndũ marĩa nyonete me kĩhooto, ũgeka nyũmba ya Ahabu o ta ũrĩa maũndũ mothe marĩa maarĩ ngoro-inĩ yakwa maatariĩ-rĩ, ariũ aku a nginya rũciaro rũa kana nĩmagaikarĩra gĩtĩ kĩa ũnene gĩa Isiraeli.
31No Jehu ndaigana kwĩmenyerera nĩguo athiage arũmĩrĩire watho wa Jehova, Ngai wa Isiraeli, na ngoro yake yothe; o na ndaatiganire na mehia ma Jeroboamu marĩa ehirie na agĩtũma Aisiraeli o nao mehie nĩ ũndũ wamo.
32Na rĩrĩ, matukũ-inĩ macio, Jehova akĩambĩrĩria kũnyihanyihithia mĩhaka ya Isiraeli; nake Hazaeli agĩkĩmahũra na ndwere ciao ciothe;
33akĩmatunya bũrũri wothe wa Gileadi, mũrĩmo ũrĩa wa Jorodani, o kũu mwena wa irathĩro, naguo ũguo nĩ ta kuuga bũrũri wa Agadi, na wa Areubeni, o na wa Amanase, kuuma o Aroeru, itũũra rĩrĩa rĩĩ gĩtuamba kĩa Arinoni, o kũu Gileadi, na Bashani guothe.
34Nacio ciĩko iria ingĩ cia Jehu, o na maũndũ mothe marĩa ekire, o na hinya wake wothe-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?
35Nake Jehu agĩgĩkoma hamwe na maithe; nao andũ makĩmũthika Samaria. Nake Jehoahazu, mũrũwe, agĩthamaka ithenya rĩake.
36Narĩo ihinda rĩrĩa Jehu aathamakĩire Isiraeli, o kũu Samaria, rĩarĩ mĩaka mĩrongo ĩĩrĩ na ĩnana.
Sign in to highlight verses and keep them in sync with the mobile app.